Љупчо Папазов е кандидатот на ВМРО ДПМНЕ за градоначалник на Општина Кочани

НЕОФИЦИЈАЛНО, ВМРО-ДПМНЕ СЕ ОПРЕДЕЛИ КАНДИДАТ ЗА ГРАДОНАЧАЛНИК НА ПРЕТСТОЈНИТЕ ИЗБОРИ ВО ОПШТИНА КОЧАНИ ДА БИДЕ ЉУПЧО ПАПАЗОВ, КОЈ ЗА ПРВПАТ ЌЕ ТРЧА НА ЛОКАЛНИТЕ ИЗБОРИ, ДОЗНАВА АКТУЕЛНОСТИ.МК ОД ПАРТИСКИ ИЗВОРИ НА ЦЕНТРАЛНО НИВО. ОФИЦИЈАЛНОТО СООПШТУВАЊЕ НА КАНДИДАТИТЕ ЗА ПОВЕЌЕ ОПШТИНИ, МЕЃУ КОИ И ЗА КОЧАНИ, ЌЕ ГО ИЗВРШИ ПРЕТСЕДАТЕЛОТ ХРИСТИЈАН МИЦКОВСКИ, НА 15. АВГУСТ.

Актуелности.мк денеска од извори од ВМРО-ДПМНЕ во Скопје, дознава дека партијата довербата за претстојните локални избори за градоначалник, ќе му ја даде на кандидатот Љупчо Папазов. Неколкуте анкети спроведени меѓу граѓаните во Општина Кочани, во изминатиот период и меѓу членството, недвосмилено покажале дека Папазов ужива голема доверба и дека ги поседува суштинските квалитети да ги добие изборите и да ја предводи општината на патот кон динамичен и сестран развој.

Утврдувањето на кандидатурата сеуште не е официјализирано, бидејќи ВМРО-ДПМНЕ планира на 15 август да го објави пакетот кандидати за градоначалници во повеќе општини, меѓу кои и Љупчо Папазов.

Папазов во времето кога ВМРО-ДПМНЕ ја имаше власта во Кочани, ја извршуваше функцијата директор на КЈП Водовод. По локалните избори во 2017 година се врати да работи во сопствената фирма „Фалкада“.

По веста за кандидатурата денеска се обидовме да го исконтактираме заради потврда на веста и за првична изјава, при што добивме одговор дека е точна, но и дека е ред прво да се сочека официјалното соопштение од партискиот врв, па потоа ќе следуваат вообичаените контакти со медиумите и директни обраќања до јавноста.

Сподели: