По ловот, дивечот очекува храна

Само што куртули од ловците дивечот се соочува со проблематично прехранување поради дебелата снежна покривка. Тоа подеднакво се однесува на ситниот полезен дивеч во полските терени, каде загрозени се зајакот и еребиците, така и на крупниот планински, главно дива свиња и срни.

Од секретарот на здружението на скопскиот концесионер на двете ловишта во Општина Кочани, дознаваме дека деновиве ќе се изврши прихранување на дивечот со зрнеста храна, како во полињата, така и на ридско-планинските предели. На точно утврдени места ќе се постават импровизирани хранилишта, со пченка, пченица и јачмен.

Другите концесионери засега не планираат прихранување на отворените ловишта. Подружницата „Осогово“ која стопанисува со планинските ловишта на Осоговските Планини, ќе прихранува само во заградениот простор на Ловниот резерват, каде егзистираат ограничен број на елени, срни и диви свињи.