Со јајце гаѓани кандидатите за советници на митингот во Кочани

На вечерашниот митинг на коалицијата предводена од ВМРО-ДПМНЕ што се одржа на платото во Трговскиот центар, во Кочани, додека на говорницата зборуваше кандидатот за градоначалник Љупчо Папазов, од терасите од зградата долета јајце, кое падна на гранитните плочи, меѓу кандидатите за советници. Можно е живото јајце да било наменето за претседателот на ВМРО-ДПМНЕ Христијан Мицковски. Но битно е што фрлачот немал среќа да погоди некој, што ќе предизвикаше поголем скандал.

Подоцна во своето обраќање лидерот Мицковски истакна дека тоа е реакција на нервозни луѓе кои се исплашени од изборите на 17 октомври, бидејќи  народот ќе ги порази и ќе ги казни за нивните криминали и национални предавства.За јавноста остануваат отворени прашањата дали некој го нарачал фрлањето на јајцето, или тоа е скандалозен потег на нецивилизиран поединец?