Општата болница во Кочани доби ковид одделение

Во Општата болница со проширена дејност од Кочани почна со работа посебен оддел за згрижување пациенти со Ковид-19. За почеток се обезбедени 25 легла, а одделот е сместен во рамки на Интерното одделение на болницата.

-Во договор со Министерството за здравство и со Клиничката болница од Штип, каде веќе се исполнети сите капацитети, почнавме со преземање на дел од позитивните пациенти со Ковид-19. Во моментот имаме тројца заболени со полесни симптоми на болеста и седуммина со позитивен тест, за кои се грижи постојниот медицински персонал, истакна Александар Серафимов, директор на Општата болница од Кочани.

Болницата во Кочани има ограничени просторни услови за обезбедување дополнителен број легла за згрижување нови пациенти. Поради тоа од Министерството за здравство беше најавено дека во болничкиот круг се планира изградба на монтажна модуларна болница за потребите на нов регионален Ковид центар.

Во меѓувреме, додека чека на потпишувањето договор со ресорното министерство за изградба на монтажната болница, Општина Кочани самоиницијативно ја презеде обврската да ги обезбеди потребните приклучни елементи за струја, вода и канализација за нејзино нормално функционирање.